3. Natthiputtasamasuttavaṇṇanā

[13] Tatiye natthi puttasamaṃ pemanti virūpepi hi attano putte suvaṇṇabimbakaṃ viya maññanti, mālāguḷe viya sīsādīsu katvā pariharamānā tehi ohānitāpi opitihitāpi gandhavilepanaṃ paṭicchantā viya somanassaṃ āpajjanti. Tenāha "natthi puttasamaṃ peman"ti. Puttapemena samaṃ pemaṃ nāma natthīti vuttaṃ hoti. Gosamikaṃ dhananti gohi samaṃ godhanasamaṃ godhanasadisaṃ aññaṃ dhanaṃ nāma natthi bhagavāti āha. Suriyasamā ābhāti suriyābhāya samā aññā ābhā nāma natthīti dasseti. Samuddaparamāti ye keci aññe sarā nāma, sabbe te samuddaparamā, samuddo tesaṃ uttamo, samuddasadisaṃ aññaṃ udakanidānannāma natthi bhagavāti.

Yasmā pana attapemena samaṃ pemaṃ nāma natthi. Mātāpitādayo hi chadḍetvāpi puttadhītādayo ca chaḍḍetvā āvāsetvāpi sattā attānameva posenti. Dhaññena ca samaṃ dhanaṃ nāma natthi. Yadā hi sattā dubbhikkhā honti, tathārūpe hi kāle hiraññasuvaṇṇādīnipi gomahisādīnipi dhaññaggahanatthaṃ dhaññasāmikānameva santikaṃ gahetvā gacchanti. Paññāya ca samā ābhā nāma natthi. Suriyādayopi ekadesaṃyeva obhāsenti, paccuppannameva ca tamaṃ vinodenti. Paññā pana dasasahassilokadhātuṃ ekappajotaṃ kātuṃ sakkoti, atītaṃsādipaṭicchādakañca