5. Saṇamānasuttavaṇṇanā

[15] Pañcame ṭhite majjhantiketi ṭhitamajjhantike. Sannisinnesūti yathāphāsukaṭṭhānaṃ upagantvā sannisinnesu visamamānesu. Ṭhitamajjhantikālo nāmesa sabbasattānaṃ iriyāpathadubbalyakālo. Idha pana pakkhīnaṃyeva vasena dassito. Saṇatevāti saṇati viya mahāviravaṃ viya muñcati. Saṇamānameva cettha "saṇatevā"ti vuttaṃ. Tappaṭibhāgaṃ nāmetaṃ. Nidāghasamayasmiñhi ṭhitamajjhantikakāle catuppadagaṇesu ceva pakkhīgaṇesu ca sannisinnesu vātapūritānaṃ susirarukkhānañceva chiddaveḷupabbānañca khandhena dhandhaṃ sākhāya sākhaṃ ghaṃsantānaṃ pādapānañca araññamajjhe mahāsaddo uppajjati. Taṃ sandhāyetaṃ vuttaṃ. Taṃ bhayaṃ paṭibhāti manti taṃ evarūpe kāle mahāaraññassa saṇamānaṃ mayhaṃ bhayaṃ hutvā upaṭṭhāti. Dandhapaññā kiresā devatā tasmiṃ khaṇe attano nisajjaphāsukaṃ kathāphāsukaṃ dutiyakaṃ alabhantī evamāha. Yasmā pana tādise kāle piṇḍapātapaṭikkantassa vivitte araññāyatane kammaṭṭhānaṃ gahetvā nisinnassa bhikkhuno anappakaṃ sukhaṃ uppajjati, yaṃ sandhāya vuttaṃ:-

"suññāgāraṃ paviṭṭhassa santacittassa bhikkhuno

amānusī ratī hoti sammā dhammaṃ vipassato"ti ca,