TIPITAKA Volume 15 : PALI ROMAN Sutta Pitaka Vol 7 : Sutta. Saṃ. Sa. Navamaṃ paṭhamāputtakasuttaṃ

[386] Sāvatthiyaṃ ... atha kho rājā pasenadikosalo divādivassa yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnaṃ kho rājānaṃ pasenadikosalaṃ bhagavā etadavoca handa kuto nu tvaṃ mahārāja āgacchasi divādivassāti . idha bhante sāvatthiyaṃ seṭṭhī gahapati kālakato tamahaṃ aputtakaṃ sāpateyyaṃ rājantepuraṃ atiharitvā āgacchāmi asīti bhante satasahassāni hiraññasseva ko pana vādo rūpiyassa tassa kho pana bhante seṭṭhissa gahapatissa evarūpo bhattabhogo ahosi kaṇājakaṃ bhuñjati bilaṅgadutiyaṃ evarūpo vatthabhogo ahosi sāṇaṃ dhāreti tipakkhavasanaṃ evarūpo yānabhogo ahosi jajjararathakena yāti paṇṇacchattakena dhāriyamānenāti.