สมเณนาติ พุทฺธสมเณน. เตสฺวาหํ น กงฺขามีติ เตสุ อหํ "กตโร กามาสโว, กตโร ภวาสโว, กตโร ทิฏฺฐาสโว, กตโร อวิชฺชาสโว"ติ เอวํ สรูปเภทโตปิ, "จตฺตาโร อาสวา"ติ เอวํ คณนปริจฺเฉทโตปิ น กงฺขามิ. เต เม ปหีนาติ น วิจิกิจฺฉามีติ เต มยฺหํ ปหีนาติ วิจิกิจฺฉํ น อุปฺปาเทสึ. ๓- อิทํ ภควา "เอวํ พฺยากโรนฺเตนปิ ตยา สุพฺยากตํ ภเวยฺย, `อชฺฌตฺตวิโมกฺขา ขฺวาหํ อาวุโส'ติอาทีนิ ปน เต วทนฺเตน อติปปญฺโจ กโต"ติ ทสฺเสนฺโต อาห.

อุฏฺฐายาสนา วิหารํ ปาวิสีติ ปญฺญตฺตปวรพุทฺธาสนโต ๔- อุฏฺฐหิตฺวา วิหารํ อนฺโตมหาคนฺธกุฏึ ปาวิสิ อสมฺภินฺนาย เอว ปริสาย. กสฺมา? พุทฺธา หิ อนิฏฺฐิตาย เทสนาย อสมฺภินฺนาย ปริสาย อุฏฺฐายาสนา คนฺธกุฏึ ปวิสนฺตา ปุคฺคลโถมนตฺถํ วา ปวิสนฺติ ธมฺมโถมนตฺถํ วา. ตตฺถ ปุคฺคลโถมนตฺถํ ปวิสนฺโต สตฺถา เอวํ จินฺเตสิ "อิมํ มยา สงฺขิตฺเตน อุทฺเทสํ อุทฺทิฏฺฐํ วิตฺถาเรน จ อวิภตฺตํ ธมฺมปฏิคฺคาหกา ภิกฺขู อุคฺคเหตฺวา อานนฺทํ วา กจฺจานํ วา อุปสงฺกมิตฺวา ปุจฺฉิสฺสนฺติ, เต มยฺหํ ญาเณน สํสนฺเทตฺวา กเถสฺสนฺติ, ตโตปิ ธมฺมปฏิคฺคาหกา ปุน มํ ปุจฺฉิสฺสนฺติ, เตสมหํ `ภิกฺขเว สุกถิตํ อานนฺเทน, สุกถิตํ กจฺจาเนน, มญฺเจปิ ตุเมฺห เอตมตฺถํ ปุจฺเฉยฺยาถ, อหํ ปน ๕- เอวเมว พฺยากเรยฺยนฺ'ติ เอวํ เต ปุคฺคเล โถเมสฺสามิ, ตโต เตสุ คารวํ ชเนตฺวา ภิกฺขู อุปสงฺกมิสฺสนฺติ, เตปิ ภิกฺขู อตฺเถ จ ธมฺเม จ นิโยเชสฺสนฺติ, เต เตหิ นิโยชิตา ติสฺโส สิกฺขา ปริปูเรตฺวา ทุกฺขสฺสนฺตํ กริสฺสนฺตี"ติ.

อถวา ปนสฺส เอวํ โหติ "เอส มยิ ปกฺกนฺเต อตฺตโน อานุภาวํ อาวีกริสฺสติ, ๖- อถ นํ อหมฺปิ ตเถว โถเมสฺสามิ, ตํ มม โถมนํ สุตฺวา คารวชาตา