รตฺติยา จ ทิวสสฺส จาติ รตฺติมฺหิ จ ทิวเส จ. ภุมฺมตฺเถ เจตํ สามิวจนํ. อญฺญเทว อุปฺปชฺชติ, อญฺญํ นิรุชฺฌตีติ ยํ รตฺตึ อุปฺปชฺชติ จ นิรุชฺฌติ จ, ตโต อญฺญเมว ทิวา อุปฺปชฺชติ จ นิรุชฺฌติ จาติ อตฺโถ. อญฺญํ อุปฺปชฺชติ, อนุปฺปนฺนเมว อญฺญํ นิรุชฺฌตีติ เอวํ ปน อตฺโถ น คเหตพฺโพ. "รตฺติยา จ ทิวสสฺส จา"ติ อิทํ ปุริมปเวณิโต ปริตฺตตรํ ๕- ปเวณึ คเหตฺวา ปเวณิวเสเนว วุตฺตํ, เอกรตฺตึ ปน เอกทิวสํ วา เอกเมว จิตฺตํ ฐาตุํ สมตฺถํ นาม นตฺถิ. เอกสฺมึ หิ อจฺฉราขเณ อเนกานิ จิตฺตโกฏิสตสหสฺสานิ อุปฺปชฺชนฺติ. วุตฺตมฺปิ เจตํ มิลินฺทปเญฺห:-

"วาหสตานํ ๖- โข มหาราช วีหีนํ, อฑฺฒจูฬญฺจ วาโห วีหิสตฺตมฺพณานิ เทฺว จ ตุมฺพา, เอกจฺฉราขเณ ๗- ปวตฺติตสฺส จิตฺตสฺส สงฺขมฺปิ น อุเปนฺติ, กลมฺปิ น อุเปนฺติ, กลคามมฺปิ น อุเปนฺตี"ติ. ๗-

@๔ สี.,อิ. ปทีปสฺสุชฺชลโต ๕ ฉ.ม. ปริตฺตกํ ๖ ฉ.ม. วาหสตํ ๗-๗ ฉ.ม. ปวตฺตสฺส