เตสํ โส ปุตฺตมํสาหาโร นวหิ การเณหิ ปฏิกูลตฺตา เนว ทวาย โหติ, น มทาย, น มณฺฑนาย, น วิภูสนาย, เกวลํ กนฺตารนิตฺถรณตฺถาเยว โหติ. กตเมหิ นวหิ การเณหิ ปฏิกูโลติ เจ? สชาติมํสตาย ญาติมํสตาย ปุตฺตมํสตาย ปิยปุตฺตมํสตาย ตรุณมํสตาย อามกมํสตาย อโครสตาย ๑- อโลณตาย อธูปิตตายาติ. เอวํ หิ เตหิ ๒- นวหิ การเณหิ ปฏิกูลํ ตํ ปุตฺตมํสํ ขาทนฺตา น สารตฺตา ภิชฺชมานสา ๓- หุตฺวา ขาทึสุ, มชฺฌตฺตภเวเยว ปน นิจฺฉนฺทราคปริโภเค ฐิตา ขาทึสุ. น อฏฺฐินหารุจมฺมนิสฺสิตฏฺฐานานิ อปเนตฺวา ถูลถูลํ วรมํสเมว ขาทึสุ, หตฺถสมฺปตฺตํ มํสเมว ปน ขาทึสุ. น ยาวทตฺถํ กณฺฐปมาณํ กตฺวา ขาทึสุ, โถกํ โถกํ ปน เอกทิวสํ ยาปนมตฺตเมว ขาทึสุ. น อญฺญมญฺญํ มจฺฉรายนฺตา ขาทึสุ, วิคตมจฺเฉรมเลน ปน ปริสุทฺเธเนว เจตสา ขาทึสุ. น อญฺญํ กิญฺจิ มิคมํสํ วา โมรมํสาทีนํ วา อญฺญตรํ ขาทามาติ สมฺมุฬฺหา ขาทึสุ, ปิยปุตฺตมํสภาวํ ปน ชานนฺตาว ขาทึสุ. น "อโห วต มยํ ปุนปิ เอวรูปํ ปุตฺตมํสํ ขาเทยฺยามา"ติ ปตฺถนํ กตฺวา ขาทึสุ, ปตฺถนํ ปน วีติวตฺตา หุตฺวา ขาทึสุ. น "เอตฺตกํ กนฺตาเร ขาทิตฺวา อวสิฏฺฐํ กนฺตารํ อติกฺกมฺม โลณมฺพิลาทีหิ โยเชตฺวา ขาทิสฺสามา"ติ สนฺนิธึ อกํสุ, กนฺตารปริโยสาเน ปน "ปุเร มหาชโน ปสฺสตี"ติ ภูมิยํ วา นิกฺขนึสุ, อคฺคินา วา ฌาปยึสุ. น "โกจิ อญฺโญ อเมฺห วิย เอวรูปํ ปุตฺตมํสํ ขาทิตุํ น ลภตี"ติ มานํ วา ทปฺปํ วา อกํสุ, นีหตมานา ปน นีหตทปฺปา หุตฺวา ขาทึสุ. "กึ อิมินา อโลเณน อนมฺพิเลน อธูปิเตน ทุคฺคนฺเธนา"ติ น หีเฬตฺวา ขาทึสุ, หีฬนํ ปน วีติวตฺตา

@๓ ฉ.ม., อิ. คิทฺธมานสา หุตฺวา ขาทึสุ. น "ตุยฺหํ ภาโค มยฺหํ ภาโค ตว ปุตฺโต มม ปุตฺโต"ติ อญฺญมญฺญํ อติมญฺญึสุ. สมคฺคา ปน สมฺโมทมานา หุตฺวา ขาทึสุ. อิมํ เนสํ เอวรูปํ วิจฺฉนฺทราคาทิปริโภคํ สมฺปสฺสมาโน สตฺถา ภิกฺขุสํฆมฺปิ ตํ การณํ อนุชานาเปนฺโต ตํ กึ มญฺญถ ภิกฺขเว, อปิ นุ เต ทวาย วา อาหารํ อาหเรยฺยุนฺติอาทิมาห. ตตฺถ ทวาย วาติอาทีนิ วิสุทฺธิมคฺเค ๑- วิตฺถาริตาเนว. กนฺตารสฺสาติ นิตฺถิณฺณาวเสสสฺส ๒- กนฺตารสฺส.

เอวเมว โขติ นวนฺนํ ปาฏิกุลฺยานํ วเสน เอวมฺปิ ปุตฺตมํสสทิโส ๓- กตฺวา ทฏฺฐพฺโพติ อตฺโถ. กตเมสํ นวนฺนํ? คมนปาฏิกุลฺยตาทีนํ. คมนปาฏิกุลฺยตํ ปจฺจเวกฺขนฺโตปิ หิ กพฬิงฺการาหารํ ปริคฺคณฺหาติ, ปริเยสนปาฏิกุลฺยตํ ปจฺจเวกฺขนฺโตปิ, ปริโภคนิธานอาสยปริปกฺกาปริปกฺกสมฺมกฺขนนิสฺสนฺทปาฏิกุลฺยตํ ปจฺจเวกฺขนฺโตปิ. ตานิ ปเนตานิ คมนปาฏิกุลฺยตาทีนิ วิสุทฺธิมคฺเค ๔- อาหารปาฏิกุลฺยตานิทฺเทเส วิตฺถาริตาเนว. อิติ อิเมสํ นวนฺนํ ปาฏิกุลฺยานํ วเสน ปุตฺตมํสูปมเมว กตฺวา อาหาโร ปริภุญฺชิตพฺโพ.