เอวํ สาเธนฺโตปิจ กพฬิงฺกาโร อาหาโร ทฺวินฺนํ รูปสนฺตตีนํ ปจฺจโย โหติ อาหารสมุฏฺฐานสฺส จ อุปาทิณฺณกสฺส จ. กมฺมชานํ อนุปาลโก หุตฺวา ปจฺจโย โหติ, อาหารสมุฏฺฐานานํ ชนโก หุตฺวาติ. ผสฺโส ปน สุขาทิวตฺถุภูตํ อารมฺมณํ ผุสนฺโตเยว สุขาทิเวทนาปวตฺตเนน สตฺตานํ ฐิติยา โหติ. มโนสญฺเจตนา กุสลากุสลกมฺมวเสน อายูหมานาเยว ภวมูลนิปฺผาทนโต สตฺตานํ ฐิติยา โหติ. วิญฺญาณํ วิชานนฺตเมว นามรูปปวตฺตเนน สตฺตานํ ฐิติยา โหติ.

เอวํ อุปตฺถมฺภนาทิวเสน อาหารกิจฺจํ สาธิยมาเนสุ ๑- ปเนเตสุ จตฺตาริ ภยานิ ทฏฺฐพฺพานิ. เสยฺยถีทํ? กพฬิงฺการาหาเร นิกนฺติภยํ, ๒- ผสฺเส อุปคมนเมว, มโนสญฺเจตนาย อายูหมานเมว, วิญฺญาเณ อภินิปาโตเยว ภยนฺติ. กึการณา? กพฬิงฺการาหาเร หิ นิกนฺตึ กตฺวา สีตาทีนํ ปุรกฺขตา สตฺตา อาหารตฺถาย มุทฺธาคณนาทิกมฺมานิ กโรนฺตา อนปฺปกํ ทุกฺขํ นิคจฺฉนฺติ. เอกจฺเจ จ อิมสฺมึ สาสเน ปพฺพชิตฺวาปิ เวชฺชกมฺมาทิกาย อเนสนาย อาหารํ ปริเยสนฺตา ทิฏฺเฐว ธมฺเม คารยฺหา โหนฺติ, สมฺปราเยปิ "ตสฺส สงฺฆาฏิปิ อาทิตฺตา สมฺปชฺชลิตา"ติอาทินา ลกฺขณสํยุตฺเต ๓- วุตฺตนเยน สมณเปตา โหนฺติ. อิมินา ตาว การเณน กพฬิงฺกาเร อาหาเร นิกนฺติ เอว ภยนฺติ เวทิตพฺพา.

ผสฺสํ อุปคจฺฉนฺตาปิ ผสฺสสฺสาทิโน ปเรสํ รกฺขิตโคปิเตสุ ทาราทีสุ ภณฺเฑสุ อปรชฺฌนฺติ, เต สห ภณฺเฑน ภณฺฑสามิกา คเหตฺวา ขณฺฑาขณฺฑิกํ