อารทฺธวิริโย จ โข ภิกฺขเวติ อารทฺธวิริโย ปุคฺคโล อิมสฺมึเยว สาสเน สุขํ วิหรติ. พาหิรสมเย ปน โย อารทฺธวิริโย วิหรติ, ๓- โส ทุกฺขํ วิหรติ. ปวิวิตฺโตติ วิวิตฺโต วิยุตฺโต หุตฺวา. สทตฺถํ ปริปูเรตีติ อรหตฺตํ ปาปุณาติ. อารทฺธวิริยสฺส หิ ฉ ทฺวารานิ สุคุตฺตานิ โหนฺติ, ตีณิ กมฺมานิ ปริสุทฺธานิ, อาชีวฏฺฐมกํ สีลํ ปริโยทาตํ, สพฺรหฺมจารีนํ วา อกฺขีสุ สีตลญฺชนํ ๔- วิย ธาตุคฺคตจนฺทนํ วิย จ มนาโป หุตฺวา สุขํ วิหรติ, สตฺถุ อชฺฌาสยํ คเหตุํ สกฺโกติ. สตฺถา หิ:-

"จิรํ ชีว มหาวีร กปฺปํ ติฏฺฐ มหามุนี"ติ ๕- เอวํ โคตมิยา วนฺทิโต "น โข โคตมิ ตถาคตา เอวํ วนฺทิตพฺพา"ติ ปฏิกฺขิปิตฺวา ตาย ยาจิโต วนฺทิตพฺพาการํ อาจิกฺขนฺโต เอวมาห:-

"อารทฺธวิริเย ปหิตตฺเต นิจฺจํ ทฬฺหปรกฺกเม

สมคฺเค สาวเก ปสฺส เอสา พุทฺธาน วนฺทนา"ติ. ๕-