5. Caṅkamasuttavaṇṇanā

[99] Pañcame passatha noti passatha nu. Sabbe kho eteti sāriputtatthero bhagavatā "etadaggaṃ bhikkhave mama sāvakānaṃ bhikkhūnaṃ mahāpaññānaṃ yadidaṃ sāriputto"ti mahāpaññesu etadagge ṭhapito. Iti naṃ "khandhantaraṃ dhātvantaraṃ āyatanantaraṃ satipaṭṭhānabodhipakkhiyadhammantaraṃ tilakkhaṇāhataṃ gambhīrapañhaṃ pucchissāmā"ti mahāpaññāva parivārenti. Sopi tesaṃ paṭhaviṃ pattharanto viya sinerupādato vālikaṃ uddharanto viya cakkavāḷapabbataṃ bhindanto viya sineruṃ ukkhipanto viya ākāsaṃ vitthārento viya candasuriye uṭṭhāpento viya ca pucchitapucchitaṃ katheti. Tena vuttaṃ "sabbe kho ete bhikkhave bhikkhū mahāpaññā"ti.

Mahāmoggallānopi bhagavatā "etadaggaṃ bhikkhave mama sāvakānaṃ bhikkhūnaṃ iddhimantānaṃ yadidaṃ mahāmoggallāno"ti iddhimantesu etadagge ṭhapito. Iti naṃ "parikammaṃ ānisaṃsaṃ adhiṭṭhānaṃ vikubbanaṃ pucchissāmā"ti iddhimantova parivārenti. Sopi tesaṃ vuttanayeneva pucchitapucchitaṃ kathesi. Tena vuttaṃ "sabbe kho ete bhikkhave bhikkhū mahiddhikā"ti.

Mahākassapopi bhagavatā "etadaggaṃ bhikkhave mama sāvakānaṃ bhikkhanaṃ dhutavādānaṃ yadidaṃ mahākassapo"ti dhutavādesu etadagge ṭhapito. Iti naṃ "dhutaṅgaparihāraṃ ānisaṃsaṃ samādānaṃ adhiṭṭhānaṃ bhedaṃ pucchissāmā"ti dhutavādāva parivārenti. Sopi tesaṃ tatheva pucchitapucchitaṃ byākaroti. Tena vuttaṃ "sabbe kho ete bhikkhave bhikkhū dhutavādā"ti.