5. Okilinīsuttavaṇṇanā

[216] Okilinīvatthusmiṃ upakkaṃ okiliniṃ okiriṇinti sā kira aṅgāracitake nipannā vipphandamānā viparivattamānā paccati, tasmā opakkā ceva hoti uṇhena agginā pakkasarīrā, okilinī ca kilinnasarīrā, bindūnissā sarīrato paggharanti, okiriṇī ca aṅgārasamparikiṇṇā. Tassā hi heṭṭhatopi kiṃsukapupphavaṇṇā aṅgārā ubhayapassesupi, ākāsatopissā upari patanti. Tena vuttaṃ "upakkaṃ okiliniṃ okiriṇin"ti. Sā issāpakatā sapatiṃ aṅgārakaṭāhena okirīti tassa kira rañño ekā nāṭakinī aṅgārakaṭāhaṃ samīpe ṭhapetvā gattato udakaṃ puñchati, pāṇinā ca sedaṃ karoti. Rājāpi tāya saddhiṃ kathañci karoti, parituṭṭhākārañca dassesi. Aggamahesī taṃ asahamānā issāpakatā hutvā acirapakkantassa rañño taṃ aṅgārakaṭāhaṃ gahetvā tassā upari aṅgāre okiri. Sā taṃ kammaṃ katvā tādisaṃyeva vipākaṃ paccanubhavituṃ petaloke nibbattā. Pañcamaṃ.