@4 cha.Ma. vipassanāpaṭivipassanā Diṭṭhigatiko atthi, so pañhaṃ pucchissati, athassāhaṃ vissajjessāmīti tassa okāsadassanatthaṃ desanaṃ osāpesi. No kallo pañhoti ayutto pañho, duppañho esoti attho. Nanu ca "katamaṃ nu kho bhante jarāmaraṇan"ti idaṃ supucchitanti? kiñcāpi supucchitaṃ, yathā pana satasahassagghanike suvaṇṇathāle vaḍḍhitassa subhojanassa matthake āmalakamatte gūthapiṇḍe ṭhapite sabbaṃ bhojanaṃ dubbhojanaṃ hoti chaḍḍetabbaṃ, evameva "kassa ca panidaṃ jarāmaraṇan"ti iminā sattūpaladdivādasadisena gūthapiṇḍena taṃ bhojanaṃ dubbhojanaṃ viya ayampi pañho duppañhova jātoti.

Brahmacariyavāsoti ariyamaggavāso. Taṃ jīvaṃ taṃ sarīranti yassa hi ayaṃ diṭṭhi, so "jīve ucchijjante sarīraṃ ucchijjati, sarīre ucchijjante jīvitaṃ ucchijjatī"ti gaṇhati. Evaṃ gaṇhato sā diṭṭhi "satto ucchijjatī"ti gahitattā ucchedadiṭṭhi nāma hoti. Sace pana saṅkhārāva uppajjanti ceva nirujjhanti cāti gaṇheyya, sāsanāvacarā sammādiṭṭhi bhaveyya. Ariyamaggo ca nāmeso vaṭṭaṃ nirodhento vaṭṭaṃ samucchindanto uppajjati, tadeva taṃ vaṭṭaṃ ucchedadiṭṭhiyā gahitākārassa sabhāve sati vanāva maggabhāvanāya nirujjhatīti maggabhāvanā niratthakā hoti. Tena vuttaṃ "brahmacariyavāso na hotī"ti.

Dutiyanaye aññaṃ jīvaṃ aññaṃ sarīranti yassa ayaṃ diṭṭhi, so "sarīraṃ idheva ucchijjati, na jīvitaṃ, jīvitaṃ pana pañjarato sakuṇo viya yathāsukhaṃ gacchatī"ti gaṇhati. Evaṃ gaṇhato sā diṭṭhi "imasmā lokā jīvitaṃ paralokaṃ gatan"ti gahitattā sassatadiṭṭhi nāma hoti. Ayañca ariyamaggo tebhūmikavaṭṭaṃ vivajjento uppajjati,