@3 Ma. tesaṃ ajjhāsayaṃ saṇhaṃ, i. sassa ajjhāsayaṃ saṇhasukhumaṃ Suññataṃ vipassanālakkhaṇaṃ ācikkhati. Ime pañcasatā bhikkhū pubbabhāgapaṭipadaṃ parisodhetvā ṭhitā sudhantasuvaṇṇasadisā suparimajjitamaṇikkhandhasannibhā, eko lokuttaramaggova nesaṃ anāgato, iti tassa āgamanatthāya satthā tesaṃ ajjhāsayaṃ avekkhiyamāno idaṃ suttaṃ āhari.

Tattha paṭiccasamuppādanti paccayākāraṃ. Paccayākāro hi aññamaññaṃ paṭicca sahite dhamme uppādeti, tasmā paṭiccasamuppādoti vuccati. Ayamettha saṅkhepo, vitthāro pana visuddhimaggato gahetabbo.

Voti ayaṃ vosaddo paccattaupayogakaraṇasampadānasāmivacanapadapūraṇesu dissati. "kacci pana vo anuruddhā samaggā sammodamānā"tiādīsu hi paccatte dissati. "gacchatha bhikkhave paṇāmemi vo"tiādīsu upayoge. "na vo mama santike vatthabban"tiādīsu karaṇe. "vanapatthapariyāyaṃ vo bhikkhave desissāmī"tiādīsu sampadāne. "sabbesaṃ vo sāriputta subhāsitan"tiādīsu sāmivacane. "ye hi vo ariyā parisuddhakāyakammantā"tiādīsu padapūraṇamatte. Idha panāyaṃ sampadāne daṭṭhabbo. Bhikkhaveti paṭissavanena abhimukhībhūtānaṃ puna ālapanaṃ. Desissāmīti desanāpaṭijānanaṃ. Taṃ suṇāthāti taṃ paṭiccasamuppādaṃ taṃ desanaṃ mayā vuccamānaṃ suṇātha.