Puññañce saṅkhāranti terasacetanābhedaṃ puññābhisaṅkhāraṃ. Abhisaṅkharotīti karoti. Puññūpagaṃ hoti viññāṇanti kammaviññāṇaṃ kammapuññena upagataṃ sampayuttaṃ hoti, vipākaviññāṇampi vipākapuññena. Apuññañce saṅkhāranti dvādasacetanābhedaṃ apuññābhisaṅkhāraṃ. Āneñjañce saṅkhāranti catucetanābhedaṃ āneñjābhisaṅkhāraṃ. Āneñjūpagaṃ hoti viññāṇanti kammāneñjena kammaviññāṇaṃ, vipākāneñjena vipākaviññāṇaṃ upagataṃ hoti. Ettha ca tividhassa kammābhisaṅkhārassa gahitattā dvādasapadiko paccayākāro gahitova hoti. Ettāvatā vaṭṭaṃ dassitaṃ.

Idāni vivaṭṭaṃ dassento yato kho bhikkhavetiādimāha. Tattha avijjāti catūsu saccesu aññāṇaṃ. Vijjāti arahattamaggañāṇaṃ. Ettha ca paṭhamameva avijjāya pahīnāya vijjā uppajjatīti. Yathā pana caturaṅgepi tame rattiṃ padīpujjalanena andhakāro pahiyyati, evaṃ vijjuppādā avijjāya pahānaṃ veditabbaṃ. Na kiñci loke upādiyatīti loke kiñci dhammaṃ na gaṇhāti na parāmasati. Anupādiyaṃ na paritassatīti anupādiyanto aggaṇhanto neva taṇhāparitassanāya. Bhayaparitassanāya paritassati, na taṇhāyati na bhāyatīti attho. Paccattaṃyevāti sayameva attanāva parinibbāyati, na aññassa ānubhāvena.

So sukhañce vedananti idaṃ kasmā ārabhi? khīṇāsavassa paccavekkhaṇaṃ Dassetvā satatavihāraṃ dassetuṃ ārabhi. Anajjhositāti taṇhāya gilitvā pariniṭṭhapetvā aggahitā. Atha dukkhavedanā kasmā vuttā, kinātampi abhinandanto atthīti? āma atthi. Sukhaṃ abhinandantoyeva hi dukkhaṃ abhinandati nāma dukkhaṃ patvā