Rattiyā ca divasassa cāti rattimhi ca divase ca. Bhummatthe cetaṃ sāmivacanaṃ. Aññadeva uppajjati, aññaṃ nirujjhatīti yaṃ rattiṃ uppajjati ca nirujjhati ca, tato aññameva divā uppajjati ca nirujjhati cāti attho. Aññaṃ uppajjati, anuppannameva aññaṃ nirujjhatīti evaṃ pana attho na gahetabbo. "rattiyā ca divasassa cā"ti idaṃ purimapaveṇito parittataraṃ paveṇiṃ gahetvā paveṇivaseneva vuttaṃ, ekarattiṃ pana ekadivasaṃ vā ekameva cittaṃ ṭhātuṃ samatthaṃ nāma natthi. Ekasmiṃ hi accharākhaṇe anekāni cittakoṭisatasahassāni uppajjanti. Vuttampi cetaṃ milindapañhe:-

"vāhasatānaṃ kho mahārāja vīhīnaṃ, aḍḍhacūḷañca vāho vīhisattambaṇāni dve ca tumbā, ekaccharākhaṇe pavattitassa cittassa saṅkhampi na upenti, kalampi na upenti, kalagāmampi na upentī"ti.

@4 Sī.,i. padīpassujjalato 5 cha.Ma. parittakaṃ 6 cha.Ma. vāhasataṃ 7-7 cha.Ma. pavattassa