1. Buddhavagga

1. Paṭiccasamuppādasuttavaṇṇanā

[1] Evamme sutanti nidānavagge paṭhamaṃ paṭiccasamuppādasuttaṃ. Tatrāyaṃ anupubbapadavaṇṇanā:- tatra kho bhagavā bhikkhū āmantesīti tatra tatrāti desakālaparidīpanaṃ. Tañhi "yaṃ samayaṃ viharati, tatra samaye, yasmiñca jetavane viharati, tattha jetavane"ti dīpeti. Bhāsitabbayutte vā desakāle dīpeti. Na hi bhagavā ayutte dese kāle ca dhammaṃ bhāsati. "akālo kho tāva bāhiyā"tiādi cettha sādhakaṃ. Khoti padapūraṇamatte, avadhāraṇe ādikālatthe vā nipāto. Bhagavāti lokagarudīpanaṃ. Bhikkhūti kathāya savanayuttapuggalavacanaṃ. Apicettha "bhikkhakoti bhikkhu, bhikkhācariyaṃ ajjhūpagatoti bhikkhū"tiādinā nayena vacanattho veditabbo. Āmantesīti ālapi abhāsi sambodhesi, ayamettha attho. Aññattha pana viññāpanepi hoti. Yathāha "āmantayāmi vo bhikkhave, paṭivedayāmi vo