@3 cha.Ma. abhinnaṭṭhānaṃ 4 Sī. vipassanañāṇampi

@5 Sī. vipassanāñāṇaṃ 6 cha.Ma., i. kimaññaṃ jāyetha vā upapajjetha vā

@7 cha.Ma. pañca padāni, i. paccudānaṃ 8 ka. āyatiṃpi jātijarāmaraṇaṃ

Añjasanti maggasseva vevacanaṃ. Udāpagatanti āpato uggatattā udāpagatanti laddhavohārena pākāravatthunā samannāgataṃ. Ramaṇīyanti samantā catunnaṃ dvārānaṃ abbhantare ca nānābhaṇḍānaṃ sampattiyā ramaṇīyaṃ. Māpehīti mahājanaṃ pesetvā vāsaṃ kārehi. Māpeyyāti vāsaṃ kāreyya. Kārenato ca paṭhamaṃ aṭṭhārasa manussakoṭiyo pesetvā "sampuṇṇan"ti pucchitvā "na tāva sampuṇṇan"ti vutte aparāni pañca kulāni peseyya. Puna pucchitvā "na tāva sampuṇṇan"ti vutte aparāni pañcapaṇṇāsa kulāni peseyya. Puna pucchitvā "na tāva sampuṇṇan"ti vutte aparāni tiṃsakulāni peseyya. Puna pucchitvā "na tāva sampuṇṇan"ti vutte aparaṃ kulasahassaṃ peseyya. Puna pucchitvā "na tāva sampuṇṇan"ti vutte aparāni ekādasanahutāni kulāni peseyya. Puna pucchitvā "na tāva sampuṇṇan"ti vutte aparāni caturāsīti kulasahassāni peseyya. Puna "sampuṇṇan"ti pucchite "mahārāja kiṃ vadesi, mahantaṃ nagaraṃ asambādhaṃ, iminā nayena kulāni pesetvā na sakkā pūretuṃ, bheriṃ cārāpetvā `amhākaṃ nagaraṃ imāya ca imāya ca sampattiyā sampannaṃ, ye tattha vasitukāmā, yathāsukhaṃ gacchantu, imañcimañca parihāraṃ labhissantī'ti nagarassa ceva vaṇṇaṃ lokassa ca parihāralābhaṃ ghosāpethā"ti vadeyya. So evaṃ kareyya. Tato manussā nagaraguṇañceva parihāralābhañca sutvā sabbadisāhi samosaritvā nagaraṃ pūreyyuṃ. Taṃ aparena samayena iddhañceva assa phītañca. Taṃ sandhāya tadassa nagaraṃ aparena samayena iddhañceva phītañcātiādi vuttaṃ.