@3 Sī. gate

Yena bhagavā tenupasaṅkamīti kasmā netvā upasaṅkami? evaṃ kirassa ahosi "ayaṃ titthiyasamaye pāṭiyekko `ahaṃ satthā'ti paṭijānanto carati, pabbājetvā sāsanassa alābhāyapi parisakkeyya. Na kho panassāhaṃ ajjhāsayaṃ ājānāmi, satthā jānissatī"ti. Tasmā taṃ ādāya yena bhagavā tenupasaṅkami. Tenahānanda susimaṃ pabbājethāti satthā kira cintesi "ayaṃ paribbājako titthiyasamaye `ahaṃ pāṭiyekko satthā'ti paṭijānamāno carati, `idha maggabrahmacariyaṃ carituṃ icchāmī'ti kira vadati, kiṃ nu kho mayi pasanno, udāhu mayhaṃ sāvakesu, udāhu mayhaṃ vā mama sāvakānaṃ vā dhammakathāya pasanno"ti. Athassa ekaṭṭhānepi pasādābhāvaṃ ñatvā "ayaṃ mama sāsane dhammaṃ thenessāmīti pabbājeti, itissa āgamanaṃ aparisuddhaṃ, nipphatti nu kho kīdisā"ti olokento "kiñcāpi `dhammaṃ thenessāmī'ti pabbājeti, katipāheneva pana ghaṭetvā arahattaṃ gaṇhissatī"ti ñatvā "tenahānanda susimaṃ pabbājethā"ti āha.

Aññā byākatā hotīti te kira bhikkhū satthu santike kammaṭṭhānaṃ gahetvā temāsaṃ vassaṃ vasantā tasmiṃyeva antotemāse ghaṭentā vāyamantā arahattaṃ paṭilabhiṃsu. Te "paṭiladdhaguṇaṃ satthu ārocessāmā"ti parisuddhapavāraṇā senāsanaṃ saṃsāmetvā satthu santikaṃ āgantvā attano paṭiladdhaguṇaṃ ārocesuṃ. Taṃ sandhāyetaṃ vuttaṃ. Aññāti arahattassa nāmaṃ. Byākatāti ārocitā. Assosīti so kira ohitasotova hutvā tesaṃ bhikkhūnaṃ ṭhitaṭṭhānaṃ gacchati taṃ taṃ kathaṃ suṇitukāmo. Yena te bhikkhū tenupasaṅkamīti kasmā upasaṅkami? taṃ kirassa pavuttiṃ sutvā etadahosi "aññā nāma imasmiṃ sāsane parimāṇaṃ sārabhūtā ācariyamuṭṭhi maññe bhavissati, pucchitvā naṃ jānissāmī"ti. Tasmā upasaṅkamīti.