Santā vimokkhāti aṅgasantatāya ceva ārammaṇasantatāya ca santā ārappavimokkhā. Kāyena phusitvāti nāmakāyena phusitvā paṭilabhitvā. Paññāvimuttā kho mayaṃ āvusoti āvuso mayaṃ nijjhānakā sukkhavipassakā paññāmatteneva vimuttāti dasseti. Ājāneyyāsi vā tvaṃ āvuso susima, na vā tvaṃ ājāneyyāsīti kasmā evamāhaṃsu? evaṃ kira nesaṃ ahosi "mayaṃ imassa ajjhāsayaṃ gahetvā kathetuṃ na sakkhissāma, dasabalaṃ pana pucchitvā nikkaṅkho bhavissatī"ti. Dhammaṭṭhitiñāṇanti vipassanāñāṇaṃ, taṃ paṭhamataraṃ uppajjati. Nibbāne ñāṇanti vipassanāya ciṇṇante pavattaṃ maggañāṇaṃ, taṃ pacchā uppajjati. Tasmā bhagavā evamāha.
Ājāneyyāsi vātiādi kasmā vuttaṃ? vināpi samādhiṃ evaṃ Ñāṇuppattidassanatthaṃ, idaṃ hi vuttaṃ hoti:- susima maggo vā phalaṃ vā na samādhinissando, na samādhiānisaṃso, na samādhissa nipphatti, vipassanāya panesā niṭṭhā, vipassanāya ānisaṃso, vipassanāya nipphatti, tasmā jāneyyāsi vā tvaṃ, na vā tvaṃ jāneyyāsi, athakho dhammaṭṭhitiñāṇaṃ pubbe, pacchā nibbāne ñāṇanti.
@3 cha.Ma., i. imassa iddhividhassa tato paresaṃ dibbasotādīnañca