12. Parammaraṇasuttavaṇṇanā

[155] Dvādasame tathāgatoti satto. Na hetaṃ āvuso atthasañhitanti āvuso etaṃ diṭṭhigataṃ atthasannissitaṃ na hoti. Nādibrahmacariyakanti maggabrahmacariyassa pubbabhāgapaṭipadāpi na hoti. Etañhi āvuso atthasañhitanti āvuso etaṃ catusaccakammaṭṭhānaṃ atthasannissitaṃ. Etaṃ ādibrahmacariyakanti etaṃ maggabrahmacariyassa ādi pubbabhāgapaṭipadā. Dvādasamaṃ.