@cha.Ma. dasabalasuttantahārako................maggaṅgasuttantahārakoti

Yāni pana "paripakkā kho rāhulassa vimuttiparipācanīyā dhammā, yannūnāhaṃ rāhulaṃ uttariṃ āsavānaṃ khaye vineyyan"ti evaṃ paresaṃ ajjhāsayaṃ khantiṃ ruciṃ manaṃ abhinīhāraṃ bujjhanabhāvañca avekkhitvā parajjhāsayavasena kathitāni, seyyathīdaṃ? cūḷarāhulovādasuttaṃ mahārāhulovādasuttaṃ dhammacakkappavattanaṃ anattalakkhaṇasuttaṃ āsīvisopamasuttaṃ dhātuvibhaṅgasuttanti evamādīni, tesaṃ parajjhāsayo nikkhePo.

Bhagavantaṃ pana upasaṅkamitvā catasso parisā cattāro vaṇṇā nāgā supaṇṇā gandhabbā asurā yakkhā mahārājāno tāvatiṃsādayo devā mahābrahmāti evamādayo "bojjhaṅgā bojjhaṅgāti bhante vuccanti, nīvaraṇā nīvaraṇāti bhante vuccanti, ime nu kho bhante pañcupādānakkhandhā, kiṃsūdha vittaṃ purisassa seṭṭhan"tiādinā nayena pañhaṃ pucchanti. Evaṃ puṭṭhena bhagavatā yāni kathitāni bojjhaṅgasaṃyuttādīni, yāni vā panaññānipi devatāsaṃyuttamārasaṃyuttabrahmasaṃyutta- sakkapañhacūḷavedallamahāvedallasāmaññaphalaāḷavakasūcilomakharalomasuttādīni, tesaṃ pucchāvasiko nikkhePo.

Yāni pana tāni uppannakāraṇaṃ paṭicca kathitāni, seyyathīdaṃ? dhammadāyādaṃ Cūḷasīhanādaṃ puttamaṃsūpamaṃ dārukkhandhūpamaṃ aggikkhandhūpamaṃ pheṇupiṇḍūpamaṃ pārichattakūpamanti evamādīni, tesaṃ atthuppattiko nikkhePo.