8. Timbarukkhasuttavaṇṇanā

[18] Aṭṭhame sā vedanātiādi "sayaṃkataṃ sukhadukkhan"ti laddhiyā paṭisedhanatthaṃ vuttaṃ. Etthāpi satoti bhummattheyeva sāmivacanaṃ. Tatrāyaṃ atthadīpanā:- "sā vedanā, so vedayatī"ti kho timbarukkhaādimhiyeva evaṃ sati pacchā "sayaṃkataṃ sukhadukkhan"ti ayaṃ laddhi hoti. Evaṃ hi sati vedanāya eva vedanā katā hoti. Evañca vadanto imissā vedanāya pubbepi atthitaṃ anujānāti, sassataṃ dīpeti sassataṃ gaṇhāti. Kasmā? tassa hi taṃ dassanaṃ etaṃ pareti, etaṃ sassataṃ upagacchatīti attho. Purimaṃ hi taṃ atthaṃ sandhāyevetaṃ bhagavatā vuttaṃ bhavissati, tasmā aṭṭhakathāya taṃ yojetvāvassa attho dīpito. Evampāhaṃ na vadāmīti ahaṃ "sā vedanā, so vedayatī"ti evampi na vadāmi, "sayaṃkataṃ sukhadukkhan"ti evampi na vadāmīti attho.

Aññā vedanātiādi "paraṃkataṃ sukhadukkhan"ti laddhiyā paṭisedhanatthaṃ vuttaṃ. Idhāpi ayaṃ atthayojanā:- "aññā vedanā añño vedayatī"ti kho

Tāya pana kataṃ añño vedayatīti evaṃ uppannāya ucchedadiṭṭhiyā saddhiṃ sampayuttāya vedanāya abhitunnassa sato "paraṃkataṃ sukhadukkhan"ti ayaṃ laddhi hoti. Evañca vadanto kārako ucchinno, aññena paṭisandhi gahitāti ucchedaṃ dīpeti, ucchedaṃ gaṇhāti. Kasmā? tassa hi taṃ dassanaṃ etaṃ pareti, etaṃ ucchedaṃ upagacchatīti attho. Idhāpi hi imāni padāni aṭṭhakathāyaṃ āharitvā yojitāneva. Iti imasmiṃ sutte vedanāsukhadukkhaṃ kathitaṃ, tañca kho vipākasukhadukkhameva vaṭṭatīti vuttaṃ. Aṭṭhamaṃ.