Āraddhaviriyo ca kho bhikkhaveti āraddhaviriyo puggalo imasmiṃyeva sāsane sukhaṃ viharati. Bāhirasamaye pana yo āraddhaviriyo viharati, so dukkhaṃ viharati. Pavivittoti vivitto viyutto hutvā. Sadatthaṃ paripūretīti arahattaṃ pāpuṇāti. Āraddhaviriyassa hi cha dvārāni suguttāni honti, tīṇi kammāni parisuddhāni, ājīvaṭṭhamakaṃ sīlaṃ pariyodātaṃ, sabrahmacārīnaṃ vā akkhīsu sītalañjanaṃ viya dhātuggatacandanaṃ viya ca manāpo hutvā sukhaṃ viharati, satthu ajjhāsayaṃ gahetuṃ sakkoti. Satthā hi:-

"ciraṃ jīva mahāvīra kappaṃ tiṭṭha mahāmunī"ti evaṃ gotamiyā vandito "na kho gotami tathāgatā evaṃ vanditabbā"ti paṭikkhipitvā tāya yācito vanditabbākāraṃ ācikkhanto evamāha:-

"āraddhaviriye pahitatte niccaṃ daḷhaparakkame

samagge sāvake passa esā buddhāna vandanā"ti.