TIPITAKA Volume 16 : PALI ROMAN Sutta Pitaka Vol 8 : Sutta. Saṃ. Ni.

[672] Sāvatthiyaṃ viharati ... bhūtapubbaṃ bhikkhave dasārahānaṃ ānako nāma mudiṅgo ahosi . tassa dasārahā ānake phaḷite aññaṃ āṇiṃ odahiṃsu . ahu kho so bhikkhave samayo yaṃ ānakassa mudiṅgassa porāṇaṃ pokkharaṃ phalakaṃ antaradhāyi āṇisaṅghāto ca 1- avasisayi . evameva kho bhikkhave bhavissanti bhikkhū anāgatamaddhānaṃ ye te suttantā tathāgatabhāsitā gambhīrā gambhīratthā lokuttarā suññatapaṭisaññuttā tesu bhaññamānesu na sussusissanti 2- na aññācittaṃ upaṭṭhāpessanti na ca te dhamme uggahetabbaṃ pariyāpuṇitabbaṃ maññissanti . ye pana te suttantā kavikatā kāveyyā cittakkharā cittabyañjanā bāhirakā sāvakabhāsitā tesu bhaññamānesu sussusissanti sotaṃ odahissanti aññācittaṃ upaṭṭhāpessanti te ca dhamme uggahetabbaṃ pariyāpuṇitabbaṃ maññissanti.