Tattha abhinandatūti "mama santikaṃ bhikkhusaṃgho āgacchatū"ti evamassa āgamanaṃ sampiyāyamāno abhinandatu. Abhivadatūti āgatassa ca ovādānusāsaniṃ dadanto abhivadatu.

Paṭisallānāti ekībhāvā. Iddhābhisaṅkhāraṃ abhisaṅkhāresīti iddhiṃ akāsi. Ekadvīhikāyāti ekeko ceva dve dve ca hutvā. Sārajjamānarūpāti ottappamānasabhāvā bhāyamānā. Kasmā pana bhagavā tesaṃ tathā upasaṅkamanāya iddhimakāsīti? hitapatthanāya. Yadi hi te vaggavaggā hutvā āgaccheyyuṃ, "bhagavā bhikkhusaṃghaṃ paṇāmetvā araññaṃ paviṭṭho, ekadivasampi tattha vasituṃ nāsakkhi, vegeneva āgato"ti keḷimpi kareyyuṃ. Atha nesaṃ neva buddhagāravaṃ paccupaṭṭhaheyyuṃ, na dhammadesanaṃ sampaṭicchituṃ samatthā bhaveyyuṃ. Sabhayānaṃ pana sasārajjānaṃ ekadvīhikāya āgacchantānaṃ buddhagāravañceva paccupaṭṭhitaṃ bhavissati, dhammadesanañca sampaṭicchituṃ sakkhissantīti cintetvā tesaṃ hitapatthanāya tathā rūpaṃ iddhiṃ akāsi.

Nisīdiṃsūti tesu hi sārajjamānarūpesu āgacchantesu eko bhikkhu "mamaṃyeva satthā oloketi, maṃyeva maññe niggaṇhitukāmo"ti saṇikaṃ āgantvā vanditvā nisīdi, athañño, athaññoti evaṃ pañca bhikkhusatāni nisīdiṃsu. Evaṃ nisinnaṃ pana bhikkhusaṃghaṃ sīdantare sannisinnaṃ mahāsamuddaṃ viya nivāte padīpaṃ viya ca niccalaṃ disvā satthā cintesi "imesaṃ bhikkhūnaṃ kīdisī dhammadesanā vaṭṭatī"ti. Athassa etadahosi "ime āhārahetu paṇāmitā, piṇḍiyālopadhammadesanāva nesaṃ sappāyā, taṃ desetvā matthake tiparivaṭṭadesanaṃ desessāmi, desanāpariyosāne sabbe arahattaṃ pāpuṇissantī"ti. Atha nesaṃ taṃ dhammadesanaṃ desento antamidaṃ bhikkhaveti ādimāha.