Tattha "iminā pātimokkhasaṃvarena upeto hoti samupeto"ti ayaṃ sīlasaṃvaro. "rakkhati cakkhundriyaṃ, cakkhundriye saṃvaraṃ āpajjatī"ti ayaṃ satisaṃvaro.

"yāni sotāni lokasmiṃ sati tesaṃ nivāraṇaṃ

sotānaṃ saṃvaraṃ brūmi paññāyete pithiyyare"ti ayaṃ ñāṇasaṃvaro. "khamo hoti sītassa uṇhassā"ti ayaṃ khantisaṃvaro. "uppannaṃ kāmavitakkaṃ nādhivāsetī"ti ayaṃ vīriyasaṃvaro. Sabbopicāyaṃ saṃvaro yathāsakaṃ saṃvaritabbānaṃ vinetabbānañca kāyaduccaritādīnaṃ saṃvaraṇato "saṃvaro "vinayanato "vinayo"ti vuccati. Evaṃ tāva saṃvaravinayo pañcadhā bhijjatīti veditabbo.