TIPITAKA Volume 17 : PALI ROMAN Sutta Pitaka Vol 9 : Sutta. Saṃ. Kha. Khandhasaṃyuttassa cullapaṇṇāsake dhammakathikavaggo dutiyo

[300] Sāvatthī . atha kho aññataro bhikkhu yena bhagavā tenupasaṅkami .pe. nisinno kho so bhikkhu bhagavantaṃ etadavoca avijjā avijjāti bhante vuccati katamā nu kho bhante avijjā kittāvatā ca avijjāgato hotīti . idha bhikkhu assutavā puthujjano rūpaṃ nappajānāti rūpasamudayaṃ nappajānāti rūpanirodhaṃ nappajānāti rūpanirodhagāminīpaṭipadaṃ nappajānāti vedanaṃ nappajānāti . saññaṃ nappajānāti . saṅkhāre nappajānāti . viññāṇaṃ nappajānāti .pe. viññāṇanirodhagāminīpaṭipadaṃ nappajānāti . ayaṃ vuccati bhikkhu avijjā ettāvatā ca avijjāgato hotīti.