TIPITAKA Volume 17 : PALI ROMAN Sutta Pitaka Vol 9 : Sutta. Saṃ. Kha.

[589] Sāvatthī . cattārome bhikkhave jhāyī. Katame cattāro. Idha bhikkhave ekacco jhāyī samādhismiṃ samādhikusalo hoti na samādhismiṃ ārammaṇakusalo . idha pana bhikkhave ekacco jhāyī samādhismiṃ ārammaṇakusalo hoti na samādhismiṃ samādhikusalo . idha pana bhikkhave ekacco jhāyī neva samādhismiṃ samādhikusalo hoti na samādhismiṃ ārammaṇakusalo . idha pana bhikkhave ekacco jhāyī samādhismiṃ @Footnote: 1 Yu. kallakusalo. Samādhikusalo ca hoti samādhismiṃ ārammaṇakusalo ca . tatra bhikkhave yvāyaṃ jhāyī samādhismiṃ samādhikusalo ca samādhismiṃ ārammaṇakusalo ca . ayaṃ imesaṃ catunnaṃ jhāyīnaṃ aggo ca seṭṭho ca pāmokkho ca uttamo ca pavaro ca. Seyyathāpi bhikkhave gavā khīraṃ .pe. Pavaro cāti.