TIPITAKA Volume 17 : PALI ROMAN Sutta Pitaka Vol 9 : Sutta. Saṃ. Kha.

[158] Sāvatthī . tatra kho . ye hi keci bhikkhave samaṇā vā brāhmaṇā vā anekavihitaṃ pubbenivāsaṃ anussaramānā anussaranti sabbe te pañcupādānakkhandhe anussaranti etesaṃ vā aññataraṃ . Katame pañca . evaṃrūpo ahosiṃ atītamaddhānanti iti vā hi bhikkhave anussaramāno rūpaññeva anussarati . evaṃvedano ahosiṃ atītamaddhānanti iti vā hi bhikkhave anussaramāno vedanaññeva anussarati . evaṃsañño ahosiṃ atītamaddhānanti . evaṃsaṅkhāro ahosiṃ atītamaddhānanti . evaṃviññāṇo ahosiṃ atītamaddhānanti iti vā hi bhikkhave anussaramāno viññāṇaññeva anussarati.