๑. อานันทสูตร

(9) 4. Theravagga

1. Ānandasuttavaṇṇanā

Theravaggassa paṭhame mantāniputtoti mantāniyā nāma brāhmaṇiyā putto. Upādāyāti āgamma ārabbha sandhāya paṭicca. Asmīti hotīti asmīti evaṃ pavattaṃ taṇhāmānadiṭṭhipapañcattayaṃ hoti. Daharoti taruṇo. Yuvāti yobbanena samannāgato. Maṇḍanakajātikoti maṇḍanakasabhāvo maṇḍanakasīlo. Mukhanimittanti mukhapaṭibimbaṃ. Taṃ hi parisuddhaṃ ādāsamaṇḍalaṃ paṭicca paññāyati. Kiṃ pana taṃ olokayato sakamukhaṃ paññāyati, paramukhanti? yadi sakaṃ bhaveyya, paramukhaṃ hutvā paññāyeyya. Atha parassa bhaveyya, vaṇṇādīhi asadisaṃ hutvā paññāyeyya. Tasmā na taṃ attano, na parassa, ādāsaṃ pana nissāya nibhāsarūpaṃ nāma taṃ paññāyatīti vadanti. Atha yaṃ udake paññāyati, taṃ kena kāraṇenāti? mahābhūtānaṃ visuddhatāya. Dhammo me abhisamitoti 1- mayā ñāṇena catusaccadhammo abhisamāgato, 2- sotāpannosmi jātoti kathesi. Paṭhamaṃ.