๑๐. คิลานทสฺสนสุตฺตวณฺณนา

[๓๕๒] ทสเม อารามเทวตาติ ปุปฺผารามผลราเมสุ อธิวตฺถา เทวตา. วนเทวตาติ วนสณฺเฑสุ อธิวตฺถา เทวตา. รุกฺขเทวตาติ มตฺตราชกาเล เวสฺสวโณ จ เทวตาติ เอวํ เตสุ เตสุ รุกฺเขสุ อธิวตฺถา เทวตา. โอสธิติณวนปฺปตีสูติ หริตกามลกีอาทีสุ มุญฺชปพฺพชาทีสุ วนเชฏฺฐกรุกฺเขสุ จ อธิวตฺถา เทวตา. สงฺคมฺมาติ สนฺนิปติตฺวา. สมาคมฺมาติ ตโต ตโต สมาคนฺตฺวา. ปณิเธหีติ ปตฺถนาวเสน อุเปหิ. อิชฺฌิสฺสติ สีลวโต เจโตปณิธีติ สมิชฺฌิสฺสติ สีลวนฺตสฺส จิตฺตปตฺถนา. ๒- ธมฺมิโกติ ทสกุสลธมฺมสมนฺนาคโต อคติคมนรหิโต. ธมฺมราชาติ ตสฺเสว เววจนํ, ธมฺเมน วา ลทฺธรชฺชตฺตา ธมฺมราชา. ตสฺมาติ ยสฺมา "เตน หิ อยฺยปุตฺต อเมฺหปิ โอวทาหี"ติ วทถ, ตสฺมา. อปฺปฏิวิภตฺตนฺติ "อิทํ ภิกฺขูนํ ทสฺสาม, อิทํ อตฺตนา ภุญฺชิสฺสามา"ติ เอวํ อวิภตฺตํ ภิกฺขูหิ สทฺธึ สาธารณเมว ภวิสฺสตีติ.

จิตฺตสํยุตฺตวณฺณนา นิฏฺฐิตา.