๑๐. ๕. สฬวคฺค

๑. อทนฺตอคุตฺตสุตฺตวณฺณนา

[๙๔] สฬวคฺคสฺส ปฐเม อทนฺตาติ อทมิตา. อคุตฺตาติ อโคปิตา. อรกฺขิตาติ น รกฺขิตา. อสํวุตาติ อปิหิตา. ทุกฺขาธิวาหา โหนฺตีติ เนรยิกาทิเภทํ อธิกทุกฺขํ อาวหนกา โหนฺติ. สุขาธิวาหา โหนฺตีติ ฌานมคฺคผลปฺปเภทํ อธิกสุขํ อาวหนกา โหนฺติ. อธิวาหนกา โหนฺติ. อธิวาหาติปิ ปาโฐ. เอเสว อตฺโถ.

สเฬวาติ ฉ เอว. อสํวุโต. ยตฺถ ทุกฺขํ นิคจฺฉตีติ เยสุ อายตเนสุ สํวรณวิรหิโต ทุกฺขํ ปาปุณาติ. เตสญฺจ เย สํวรณํ อเวทิสุนติ เย เตสํ อายตนานํ สํวรํ วินฺทึสุ ปฏิลภึสุ. วิหรนฺตานวสฺสุตาติ วิหรนฺติ อนวสฺสุตา อตินฺตา.