ตํ สุตฺวา อิตโร จตุนฺนํ อาสีวิสานํ ปมาทกฺขณํ ราชปุริเสหิ จ ปวิวิตฺตํ ทิสฺวา วามหตฺเถน ทกฺขิณหตฺถํ เวเฐตฺวา ทกฺขิณกณฺณจูฬิกาย ผณํ ฐเปตฺวา สยิตาสีวิสสฺส สรีรํ ปริมชฺชนฺโต วิย สณิกํ ตํ อปเนตฺวา เอเตเนวุปาเยน เสเสปิ อปเนตฺวา เตสํ ภีโต ปลาเยยฺย. อถ นํ เต อาสีวิสา "อยํ อมฺหากํ รญฺญา อุปฏฺฐาโก ทินฺโน"ติ อนุพนฺธมานา อาคจฺเฉยฺยุํ. อิทํ สนฺธาย อถโข โส ภิกฺขเว ปุริโส ภีโต จตุนฺนํ อาสีวิสานํ ฯเปฯ ปลาเยถาติ วุตฺตํ.

ตสฺมึ ปน ปุริเส เอวํ อาคตมคฺคํ โอโลเกตฺวา โอโลเกตฺวา ปลายนฺเต ราชา "ปลาโต โส ปุริโส"ติ สุตฺวา "โก นุ โข ตํ อนุพนฺธิตฺวา ฆาเตตุํ สกฺขิสฺสตี"ติ วิจินนฺโต ตสฺเสว ปจฺจตฺถิเก ปญฺจ ชเน ลภิตฺวา "คจฺฉถ นํ อนุพนฺธิตฺวา ฆาเตถา"ติ เปเสยฺย. อถสฺส อตฺถจรา ปุริสา ตํ ปวตฺตึ ญตฺวา อาโรเจยฺยุํ. โส ภิยฺโยโส มตฺตาย ภีโต ปลาเยถ. อิมมตฺถํ สนฺธาย ตเมนํ เอวํ วเทยฺยุนฺติอาทิ วุตฺตํ.

ฉฏฺโฐ อนฺตรจโร วธโกติ "ปฐมํ อาสีวิเสหิ อนุพทฺโธ อิโต จิโต จ เต วญฺเจนฺโต ปลายิ, อิทานิ ปญฺจหิ ปจฺจตฺถิเกหิ อนุพทฺโธ สุฏฺฐุตรํ ปลายติ, น สกฺกา โส เอวํ คเหตุํ, อุปลาฬนาย ปน สกฺกา, ตสฺมา ทหรกาลโต ปฏฺฐาย เอกโต ขายิตฺวา จ ปิวิตฺวา จ สมฺพนฺธํ ๑- อนฺตรจรํ วธกมสฺส เปเสถา"ติ อมจฺเจหิ วุตฺเต น รญฺญา ปริเยสิตฺวา เปสิโต อนฺตรจโร วธโก.