สตฺถา วิหารสฺมึเยว ฐิโต จีวรํ ปารุปิตฺวา อนฺโตสาณิยาว สทฺธึ ภิกฺขุสํเฆน ราชเคหํ อาคจฺฉติ, กตภตฺตกิจฺโจ อนฺโตสาณิยาว คจฺฉติ. โกจิ กฏจฺฉุภิกฺขามตฺตมฺปิ ทาตุํ น ลภติ. ตโต นาครา อุชฺฌายึสุ "พุทฺโธ โลเก อุปฺปนฺโน, น จ มยํ ปุญฺญานิ กาตุํ ลภาม. ยถา หิ จนฺทิมสูริยา สพฺเพสํ อาโลกํ กโรนฺติ, เอวํ พุทฺธา นาม สพฺเพสํ หิตตฺถาย อุปฺปชฺชนฺติ, อยํ ปน ราชา สพฺเพสํ ปุญฺญเจตนํ ๒- อตฺตโนเยว อนฺโต ปเวเสตี"ติ.

ตสฺส จ รญฺโญ อญฺเญ ตโย ปุตฺตา อตฺถิ, นาครา เตหิ สทฺธึ เอกโต หุตฺวา สมฺมนฺตยึสุ "ราชกุเลหิ สทฺธึ อฏฺโฏ นาม นตฺถิ, เอกํ อุปายํ กโรมา"ติ. เต ปจฺจนฺเต โจเร อุฏฺฐาเปตฺวา "กติปยา คามา ปหฏา"ติ สาสนํ อาหราเปตฺวา รญฺโญ อาโรจยึสุ. ราชา ปุตฺเต ปกฺโกสาเปตฺวา "ตาตา อหํ มหลฺลโก, คจฺฉถ โจเร วูปสเมถา"ติ เปเสสิ. ปยุตฺตโจรา อิโต จิโต จ อวิปฺปกิริตฺวา ๓- เตสํ สนฺติกเมว อาคมึสุ. เต อนาวาเส คาเมว เปเสตฺวา ๔- "วูปสมิตา โจรา"ติ อาคนฺตฺวา ราชานํ วนฺทิตฺวา อฏฺฐํสุ.

ราชา ตุฏฺโฐ "ตาตา วรํ โว เทมี"ติ อาห. เต อธิวาเสตฺวา คนฺตฺวา นาคเรหิ สทฺธึ มนฺตยึสุ "รญฺญา อมฺหากํ วโร ทินฺโน, กึ คณฺหามา"ติ. อยฺยปุตฺตา ตุมฺหากํ หตฺถิอสฺสาทโย น ทุลฺลภา, พุทฺธรตนํ ปน ทุลฺลภํ, น สพฺพกาลํ อุปฺปชฺชติ, ตุมฺหากํ เชฏฺฐภาติกสฺส ปุสฺสพุทฺธสฺส ปฏิชคฺคนวรํ