@๓ ก. วิปฺปกิริตฺวา ๔ ฉ.ม. คาเม วาเสตฺวา คณฺหถาติ. เต "เอวํ กริสฺสามา"ติ นาครานํ ปฏิสฺสุณิตฺวา กตมสฺสุกมฺมา นฺหาตานุลิตฺตา ๑- รญฺโญ สนฺติกํ คนฺตฺวา "เทว โน วรํ เทถา"ติ ยาจึสุ. กึ คณฺหิสฺสถ ตาตาติ. เทว อมฺหากํ หตฺถิอสฺสาทีหิ อตฺโถ นตฺถิ, เชฏฺฐภาติกสฺส โน ปุสฺสพุทฺธสฺส ๒- ปฏิชคฺคนวรํ เทถาติ. "อยํ วโร น สกฺกา มยา ชีวมาเนน ทาตุนฺ"ติ เทฺว กณฺเณ ปิทหิ. ๓- "เทว น ตุเมฺห อเมฺหหิ พลกฺกาเรน วรํ ทาปิตา, ตุเมฺหหิ อตฺตโน รุจิยา ตุฏฺเฐหิ ทินฺโน, กึ เทว ราชกุลสฺส เทฺว กถา วฏฺฏนฺตี"ติ สจฺจวาทิตาย ภณึสุ. ๔-

ราชา วินิวตฺติตุํ อลภนฺโต "ตาตา สตฺต สํวจฺฉเร สตฺต มาเส สตฺต จ ทิวเส อุปฏฺฐหิตฺวา ตุมฺหากํ ทสฺสามี"ติ อาห. สุนฺทรํ เทว ปาฏิโภคํ เทถาติ. กิสฺส ปาฏิโภคํ ตาตาติ. เอตฺตกํ กาลํ อมรณปาฏิโภคํ เทถาติ. ตาตา อยุตฺตปาฏิโภคํ ทาเปถ, น สกฺกา เอวํ ปาฏิโภคํ ทาตุํ, ติณคฺเค อุสฺสาวพินฺทุสทิสํ สตฺตานํ ชีวิตนฺติ. โน เจ เทว ปาฏิโภคํ เทถ, มยํ อนฺตรา มตา กึ กุสลํ กริสฺสามาติ. เตนหิ ตาตา ฉ สํวจฺฉรานิ เทถาติ. น สกฺกา เทวาติ. เตนหิ ปญฺจ, จตฺตาริ, ตีณิ, เทฺว, เอกํ สํวจฺฉรํ เทถ. สตฺต, ฉ มาเส เทถ ฯเปฯ มาสฑฺฒมตฺตํ เทถาติ. น สกฺกา เทวาติ. เตนหิ ทิวสมตฺตํ เทถาติ. สาธุ เทวาติ สตฺต ทิวเส สมฺปฏิจฺฉึสุ. ราชา สตฺต สํวจฺฉเร สตฺต มาเส สตฺต ทิวเส กตฺตพฺพสกฺการํ สตฺตสุเยว ทิวเสสุ อกาสิ.

ตโต ปุตฺตานํ วสนฏฺฐานํ สตฺถารํ เปเสตุํ อฏฺฐอุสภวิตฺถตํ มคฺคํ อลงฺการาเปสิ, มชฺฌฏฺฐาเน จตุอุสภปฺปมาณํ ปเทสํ หตฺถีหิ มทฺทาเปตฺวา กสิณมณฺฑลสทิสํ กตฺวา วาลิกาย สนฺถราเปตฺวา ปุปฺผาภิกิณฺณํ อกาสิ, ตตฺถ ตตฺถ กทลิโย จ ปุณฺณฆเฏ จ ฐปาเปตฺวา ธชปฏากา อุกฺขิปาเปสิ. อุสเภ อุสเภ โปกฺขรณึ ขนาเปสิ, อปรภาเค ทฺวีสุ ปสฺเสสุ คนฺธมาลาปุปผาปเณ ปสาราเปสิ.