อยํ ปน กาโย เนว ปทุมคพฺเภ, น ปุณฺฑริกนีลุปฺปลาทีสุ สญฺชายติ, อามาสยปกฺกาสยานํ ปน อนฺตเร พหลนฺธกาเร ทุคฺคนฺธปวนวิจริเต ปรมเชคุจฺเฉ โอกาเส ปูติมจฺฉาทีสุ กิมิ วิย สญฺชายติ, อยํ รูปสฺส สญฺชาติคติ นาม.
ทุวิธํ ปน รูปสฺส ลกฺขณํ, "รุปฺปตีติ โข ภิกฺขเว ตสฺมา รูปนฺ"ติ ๔- เอวํ วุตฺตํ รุปฺปนสงฺขาตํ ปจฺจตฺตลกฺขณญฺจ อนิจฺจาทิเภทํ สามญฺญลกฺขณญฺจ, อยมสฺส สลกฺขณคติ นาม.
"คติ มิคานํ ปวนํ อากาโส ปกฺขินํ คติ
วิภโว คติ ธมฺมานํ นิพฺพานํ อรหโต คตี"ติ ๕-