ยํ โข โวติ ยํ โข ตุมฺหากํ. จกฺขุนา โข อาวุโส โลกสฺมึ โลกสญฺญี โหติ โลกมานีติ จกฺขุํ หิ โลเก อปฺปหีนทิฏฺฐิปุถุชฺชโน สตฺตโลกวเสน โลโกติ สญฺชานาติ เจว มญฺญติ จ, ตถา จกฺกวาฬโลกวเสน. น หิ อญฺญตฺร จกฺขฺวาทีหิ ทฺวาทสอายตเนหิ ตสฺส สา สญฺญา วา มาโน วา อุปฺปชฺชติ. เตน วุตฺตํ "จกฺขุนา โข อาวุโส โลกสฺมึ โลกสญฺญี โหติ โลกมานี"ติ. อิมสฺส จ โลกสฺส คมเนน อนฺโต นาม ญาตุํ วา ทฏฺฐุํ วา ปตฺตุํ วา น สกฺกา. ลุชฺชนฏฺเฐน ปน ตสฺเสว จกฺขฺวาทิเภทสฺส โลกสฺส นิพฺพานสงฺขาตํ อนฺตํ อปฺปตฺวา วฏฺฏทุกฺขสฺส อนฺตกิริยา นาม นตฺถีติ เวทิตพฺพา.

เอวํ ปญฺหํ วิสฺสชฺเชตฺวา อิทานิ "สาวเกน ปโญฺห กถิโตติ มา นิกฺกงฺขา อหุวตฺถ, อยํ ภควา สพฺพญฺญุตญาณตุลํ คเหตฺวา นิสินฺโน, อิจฺฉมานา ตเมว อุปสงฺกมิตฺวา นิกฺกงฺขา โหถา"ติ อุยฺโยเชนฺโต อากงฺขมานา ปนาติอาทิมาห.

อิเมหิ อากาเรหีติ อิเมหิ การเณหิ จกฺกวาฬโลกสฺส อนฺตาภาวการเณหิ เจว สงฺขารโลกสฺส อนฺตาปตฺติการเณหิ จ.