2. Khaṇasuttavaṇṇanā

[135] Dutiye chaphassāyatanikā nāmāti visuṃ chaphassāyatanikā nāma nirayo natthi. Sabbesupīti hi ekattiṃsamahānirayesu chadvāraphassāyanapaññatti hotiyeva. Idaṃ pana avīcimahānirayaṃ sandhāya vuttaṃ. Saggāti idhāpi tāvatiṃsapurameva adhippetaṃ. Kāmāvacaradevaloke pana etasmimpi chaphassāyatanapaññattiyā abhāvo nāma natthi. Iminā kiṃ dīpeti? niraye ekantadukkhasamappitabhāvena devaloke ca ekantasukhasamappitattā ekantakhiḍḍārativasena uppannapamādena maggabrahmacariyavāsaṃ vasituṃ na sakkā. Manussaloko pana vokiṇṇasukhadukkho, idheva apāyopi saggopi paññāyati. Ayaṃ maggabrahmacariyassa kammabhūmi nāma, sā tumhehi laddhā. Tasmā ye vo ime mānussakā khandhā laddhā, te vo lābhā. Yaṃ ca vo idaṃ manussattaṃ laddhaṃ, paṭiladdho vo brahmacariyavāsassa khaṇo samayoti. Vuttampi cetaṃ porāṇehi:-

"ayaṃ kammabhūmi idha maggabhāvanā

ṭhānāni saṃvejaniyā bahū idha