5. Paṭhamakāmabhūsuttavaṇṇanā

[347] Pañcame nelaṅgoti niddoso, setapacchādoti setapaṭicchādano. Anīghanti niddukkhaṃ. Muhuttaṃ tuṇhī hutvāti tassa atthapekkhanatthaṃ tīṇi piṭakāni kaṇṇe kuṇḍalaṃ viya sañcālento "ayaṃ imassa attho, ayaṃ imassa attho"ti upaparikkhanatthaṃ muhuttaṃ hutvā tuṇhī hutvā. Vimuttiyāti arahattaphalavimuttiyā. Imaṃ pana pañhaṃ kathento upāsako dukkaraṃ akāsi. Sammāsambuddho hi "passatha no tumhe bhikkhave etaṃ bhikkhuṃ āgacchantaṃ odātakaṃ tanukaṃ tuṅganāsikan"ti attano diṭṭhena kathesi. Ayaṃ ca nayaggāhena "arahato etaṃ adhivacanan"ti āha.