9. Kulasuttavaṇṇanā

[361] Navame dubbhikkhāti dullabhabhikkhā. Dvīhitikāti "jīvissāma nu kho na nu kho"ti evaṃ pavattaīhitikā. "duhitikā"tipi pāṭho. Ayamevattho. Dukkhā

Tattha tattha matamanussānaṃ vippakiṇṇāni setāni aṭṭhikāni etthāti setaṭṭhikā. Salākā vuttāti salākamattavuttā, yaṃ tattha vuttaṃ vāpitaṃ, taṃ salākamattameva ahosi, phalena janayatīti attho.

Uggilitunti dve ante mocetvā kathetuṃ asakkonto uggilituṃ bahi nīharituṃ na sakkhiti. Ogilitunti pucchāya dosaṃ disvā hāretuṃ asakkonto ogilituṃ anto pavesetuṃ na sakkhiti. Ito so gāmaṇi ekanavutikappeti bhagavā kathayamānova yāva nikkhanto nāsikavāto na puna pavisati, tāvatakena kālena ekanavutikappe anussari "atthi nu kho kiñci kule pakkabhikkhādānena upahatapubban"ti parijānanatthaṃ. Athekampi apassanto "ito so gāmaṇī"tiādimāha. Idāni dānādīnaṃ ānisaṃsaṃ kathento athakho yāni tāni kulāni addhānīti dhammadesanaṃ ārabhi. Tattha dānasambhūtānīti dānena sambhūtāni nibbattāni. Sesapadadvayepi ese nayo. Ettha pana saccaṃ nāma saccavāditā. Sāmaññaṃ nāma sesasīlaṃ. Vikiratīti ayogena vaḷañjento vippakirati. Vidhamatīti dhamento viya nāseti. Viddhaṃsetīti nāseti. Aniccatāti hutvā abhāvo bahunāpi kālena saṅgatānaṃ khaṇeneva antaradhānaṃ.