Vihārā nikkhamitvāti "rattiṭṭhakāparicchanne rajatapaṭasannibhasamavippakiṇṇavālike ramaṇīye pariveṇe kaṭṭhakalāpe bandhitvā khipamānā vālikaṃ āluḷetvā hatthena hatthaṃ ādāya paṇṇakuṭiṃ pariyāyantā `ime imesaṃ bharatakānaṃ sakkatā, ime imesaṃ bharatakānaṃ sakkatā'ti punappunaṃ viravantā ativiya ime māṇavakā kīḷakīḷaṃ karonti, vihāre bhikkhūnaṃ atthibhāvampi na jānanti, dassessāmi nesaṃ bhikkhūnaṃ atthibhāvan"ti cintetvā paṇṇakuṭito nikkhami.

Sīluttamā pubbatarā ahesunti guṇavantānaṃ guṇe kathite nigguṇānaṃ guṇābhāvo pākaṭova bhavissatīti porāṇakabrāhmaṇānaṃ guṇe kathento evamāha. Tattha sīluttamāti sīlajeṭṭhakā. Sīlaṃ hi tesaṃ uttamaṃ, na jātigottaṃ. Ye purāṇaṃ sarantīti ye porāṇakaṃ brāhmaṇadhammaṃ saranti. Abhibhuyya kodhanti kodhaṃ abhibhavitvā tesaṃ

Dhamme ca jhāne ca ratāti dasavidhe kusalakammapathadhamme aṭṭhasamāpattijjhānesu ca ratā.

Evaṃ porāṇānaṃ guṇaṃ kathetvā athetarahi brāhmaṇānaṃ madaṃ nimmadanto imeva vokkamma jahāmhasetiādimāha. Tattha vokkammāti etehi guṇehi apakkamitvā. Jahāmhaseti mayaṃ jahāma sajjhāyāmāti ettakeneva brāhmaṇamhāti maññamānā brāhmaṇā mayanti iminā gottena mattā hutvā visamaṃ caranti, visamāni kāyakammādīni karontīti attho. Puthuttadaṇḍāti puthu attadaṇḍā etehīti puthuttadaṇḍā, gahitanānāvidhadaṇḍāti attho. Tasathāvaresūti sataṇhe nittaṇeehasu. Aguttadvārassa bhavanti moghāti asaṃvutadvārassa sabbepi vattasamādānā moghā bhavantīti dīpeti, yathā kinti? supineva laddhaṃ purisassa vittanti. Yathā supine purisassa laddhaṃ maṇimuttādinānāvidhaṃ vittamoghaṃ hoti, pabujjhitvā kiñci na passati, evaṃ moghā bhavantīti attho.