Tasmiṃ samaye bhikkhusaṃghaṃ saritvā "mādiso nāma paṭhavissaro rājā tittiramaṃsaṃ khāditukāmo tīṇi saṃvaccharāni na labhi, paccamāno bhikkhusaṃgho kuto labhissatī"ti mukhe pakkhittakhaṇḍaṃ bhūmiyaṃ chaḍḍesi. Amaccaputto jannukehi patitvā mukhena gaṇhi. Rājā "apehi tāta, jānāmahaṃ tava niddosabhāvaṃ, iminā nāma kāraṇena mayā etaṃ chaḍḍitan"ti kathetvā "sesakaṃ tatheva saṅgopetvā ṭhapehī"ti āha.
Punadivase rājakulūpako thero piṇḍāya pāvisi. Amaccaputto taṃ disvā pattaṃ gahetvā rājagehaṃ pavesesi. Aññataro vuḍḍhapabbajitopi therassa pacchāsamaṇo viya hutvā anubandhanto pāvisi. Thero "raññā pakkosāpitabhikkhu bhavissatī"ti pamajji. Amaccaputtopi "therassa upaṭṭhāko bhavissatī"ti pamādaṃ āpajji. Tesaṃ nisīdāpetvā yāguṃ adaṃsu. Yāguyā pītāya rājā tittire upanesi. Theropi ekaṃ gaṇhi, itaropi ekaṃ gaṇhi. Rājā "anubhāgo atthi, anāpucchitvā khādituṃ na yuttan"ti mahātheraṃ āpucachi. Thero hatthaṃ pidahi, mahallakatthero sampaṭicchi. Rājā anattamano hutvā katabhattakiccaṃ theraṃ pattaṃ ādāya anugacchanto āha "bhante Kulagehaṃ āgacchantehi uggahitavattaṃ bhikkhuṃ gahetvā āgantuṃ vaṭṭatī"ti. Thero tasmiṃ khaṇe aññāsi "na esa raññā pakkosāpito"ti.
Punadivase upaṭṭhākasāmaṇeraṃ gahetvā pāvisi. Rājā tadāpi yāguyā pītāya tittire upanāmesi. Thero ekaṃ aggahesi, sāmaṇero aṅguliṃ cāletvā majjhe chindāpetvā ekakoṭṭhāsameva aggahesi. Rājā taṃ koṭṭhāsaṃ mahātherassa upanāmesi. Mahāthero hatthaṃ pidahi, sāmaṇeropi pidahi. Rājā avidūre nisīditvā khaṇḍākhaṇḍaṃ chinditvā khādanto "uggahitavatte nissāya diyaḍḍhatittire khādituṃ labhimhā"ti āha. Tassa maṃse khāditamatteyeva kaṇṇehi pubbo nikkhami. Tato mukhaṃ vikkhāletvā sāmaṇeraṃ upasaṅkamitvā "pasannosmi tāta, aṭṭha te dhuvabhattāni demī"ti āha. Ahaṃ mahārāja upajjhāyassa dammīti. Aparānipi aṭṭha demīti. Tāni amhākaṃ ācariyassa dammīti. Aparānipi aṭṭha demīti. Tāni samānupajjhāyānaṃ dammīti. Aparānipi aṭṭha demīti. Tāni bhikkhusaṃghassa demīti. Aparānipi aṭṭha demīti. Sāmaṇero adhivāsesi. Evaṃ taṃ paṭiggahaṇamattaṃ jānanto anuppannañceva lābhaṃ uppādeti, uppannañca thāvaraṃ karoti. Idaṃ paṭiggahaṇapamāṇaṃ nāma. Tattha paribhogapamāṇaṃ paccavekkhaṇapayojanaṃ, "idamatthi yaṃ bhojanaṃ bhuñjissāmī"ti pana paccavekkhitaparibhogasseva payojanattā paribhogappamāṇaṃyeva nāma, taṃ idha adhippetaṃ. Teneva paṭisaṅkhā yonisotiādimāha. Itarampi pana vaṭṭatiyeva.