Rājā ekaṃ paṇḍitaṃ amaccaṃ āṇāpesi "gaccha kumāraṃ ovaditvā vinicchayaṭṭhānādīni kāretvā puna abhisekaṃ katvā ehī"ti. Na sakkā deva kumāraṃ ovadituṃ caṇḍo kumāro ghāteyyāpi manti. Athekaṃ balasampannaṃ yodhaṃ āṇāpesi "tvaṃ iminā saddhiṃ gantvā sace so ovāde na tiṭṭhati, sīsamassa Chindāhī"ti. Iti so amacco yodho cāti idaṃ sīghaṃ dūtayugaṃ tattha gantvā dovārikaṃ pucchi "kahaṃ bho nagarassa sāmi kumāro"ti. Esa majjhe siṅghāṭake suraṃ pivanto dhuttaparivārito gītādiratiṃ anubhonto nisinnoti. Atha taṃ dūtayugaṃ gantvā amacco tāvettha "sāmi vinicchayaṭṭhānādīni kira kāretvā sādhukaṃ rajjamanusāsāhī"ti āha. Kumāro asuṇanto viya nisīdi. Atha naṃ yodho sīse gahetvā "sace rañño āṇaṃ karosi, kara, no ce, ettheva vegena sīsaṃ pātessāmī"ti khaggaṃ abbhāhi. Paricārikā dhuttā tāvadeva disāsu palāyiṃsu. Kumāro bhīto sāsanaṃ sampaṭicchi. Athassa tattheva abhisekaṃ katvā setacchattaṃ ussāpetvā "sammā rajjaṃ anusāsāhī"ti raññā vuttaṃ yathābhūtavacanaṃ niyyātetvā yathāgatamaggameva paṭipajjiṃsu. Imamatthaṃ āvīkaronto bhagavā "puratthimāya disāyā"ti āha.
Tatridaṃ opammasaṃsandanaṃ:- samiddhamahānagaraṃ viya hi nibbānanagaraṃ daṭṭhabbaṃ, sattaratanasamannāgato rājā cakkavatti viya sattabojjhaṅgaratanasamannāgato dhammarājā sammāsambuddho, paccantimanagaraṃ viya sakkāyanagaraṃ, tasmiṃ nagare kūṭarājaputto viya imassa bhikkhuno kūṭacittuppādo, kūṭarājaputtassa dhuttehi parivāritakālo viya imassa bhikkhuno pañcahi nīvaraṇehi samaṅgikālo, dve sīghadūtā viya samathakammaṭṭhānañca vipassanākammaṭṭhānañca, mahāyodhena sīse gahitakālo viya uppannena paṭhamajjhānasamādhinā niccalaṃ katvā cittaggahitakālo, yodhena sīse gahitamatte dhuttānaṃ disāsu palāyitvā dūrībhāvo viya paṭhamajjhānamhi uppannamatte nīvaraṇānaṃ dūrībhāvo, "karissāmi rañño sāsanan"ti sampaṭicchitamatte vissaṭṭhakālo viya jhānato vuṭṭhitakālo, amaccena rañño sāsanaṃ ārocitakālo viya samādhinā cittaṃ kammaniyaṃ katvā vipassanākammaṭṭhānassa vaḍḍhitakālo, tatthevassa tehi dvīhi dūtehi katābhisekassa setacchattaussāpanaṃ viya samathavipassanākammaṭṭhānaṃ nissāya arahattappattassa vimuttisetacchattussāpanaṃ veditabbaṃ.