Suṃsumāropi bahi nikkhanto gahetabbaṃ na passati, akkhiṃ nimmiletvā vicarati. Yadā pana byāmasatamattaṃ udakaṃ ogāhitvā bilaṃ pavisitvā nipanno hoti, tadā tassa cittaṃ ekaggaṃ hoti, sukhaṃ supati. Evameva sotaṃpetaṃ vilajjhāsayaṃ ākāsasannissitaṃ, kaṇṇachiddakūpakeyeva ajjhāsayaṃ karoti, kaṇṇacchiddākāsoyeva tassa saddasavane paccayo hoti. Ajaṭākāsopi vaṭṭatiyeva. Antoleṇasmiṃ hi sajjhāye kayiramāne na leṇacchadanaṃ bhinditvā saddova bahi nikkhamati, dvāravātapānachiddehi pana nikkhamitvā dhātuparamparā ghaṭṭento āgantvā sotappasādaṃ ghaṭeti. Atha tasmiṃ kāle "asukaṃ nāma sajjhāyatī"ti leṇapiṭṭhe nisinnā jānanti.

Evaṃ sante sampattagocaratā hoti, kiṃ panetaṃ sampattagocaranti? āma Sampattagocaraṃ. Yadi evaṃ dūre bheriādīsu vajjamānesu "dūre saddo"ti jānanaṃ na bhaveyyāti no na bhavati. Sotappasādasmiṃ hi saṅghaṭṭite "dūre saddo, āsanne saddo, paratīre orimatīre"ti tathā tathā jānanākāro hoti, dhammatā esāti. Kiṃ etāya dhammatāya, yato yato chiddaṃ, tato tato savanaṃ hoti candimasūriyādīnaṃ dassanaṃ viyāti asampattagocaramevetaṃ.

Pakkhīpi rukkhe vā bhūmiyaṃ vā na ramati. Yadā pana ekaṃ vā dve vā leṇḍupāte atikkamma ajaṭākāsaṃ pakkhando hoti, tadā ekaggacittataṃ āpajjati. Evameva ghānampi ākāsajjhāsayaṃ vātūpanissayagandhagocaraṃ. Tathāhi gāvo navavuṭṭhe deve bhūmiṃ ghāyitvā ghāyitvā ākāsābhimukhā hutvā vātaṃ ākaḍḍhanti. Aṅgulīhi gandhapiṇḍaṃ gahetvāpi ca upasiṅghanakāle vātaṃ anākaḍḍhento neva tassa gandhaṃ jānāti.