@4 Sī. vaṭṭanti, mayaṃ saccavāditāya gaṇhimhāti āhaṃsu,

@ka. vaṭṭatīti saccavāditāya gaṇhiṃsu Majjhaṭṭhāne catuusabhavitthārassa alaṅkatamaggassa ubhosu passesu dve dve usabhavitthāramagge khāṇukaṇṭake harāpetvā daṇḍadīpikāyo kārāpesi. Rājaputtāpi attano āṇāpavattiṭṭhāne soḷasausabhamaggaṃ tatheva alaṅkārāpesuṃ.

Rājā attano āṇāpavattiṭṭhānassa kedārasīmaṃ gantvā satthāraṃ vanditvā paridevamāno "tātā mayhaṃ dakkhiṇakkhiṃ uppāṭetvā gaṇhantā viya gacchatha. Evaṃ gaṇhitvā gatā pana buddhānaṃ anucchavikaṃ kareyyātha, mā surāsoṇḍā viya pamattā vicaritthā"ti āha. Te "jānissāma mayaṃ devā"ti satthāraṃ gahetvā gatā vihāraṃ kāretvā satthu niyyātetvā tattha satthāraṃ paṭijaggantā kālena therāsane, kālena majjhimāsane, kālena saṃghanavakāsane tiṭṭhanti. Dānaṃ upaparikkhamānānaṃ tiṇṇampi janānaṃ ekasadisameva ahosi. Te upakaṭṭhāya vassūpanāyikāya cintayiṃsu "kathaṃ nu kho satthu ajjhāsayaṃ gaṇheyyāmā"ti. Atha nesaṃ etadahosi "buddhā nāma dhammagaruno na āmisagaruno, sīle patiṭṭhamānā mayaṃ satthu ajjhāsayaṃ gahetuṃ sakkhissāmā"ti dānasaṃvidhāyake manusse pakkosāpetvā "tātā imināva nīhārena yāgubhattakhādanīyādīni sampādentā dānaṃ pavattethā"ti vatvā dānasaṃvidahanapalibodhaṃ chindiṃsu.

Atha nesaṃ jeṭṭhabhātā pañcasate purise ādāya dasasīlesu patiṭṭhāya dve kāsāyāni acchādetvā kappiyaṃ udakaṃ paribhuñjamāno vāsaṃ kappesi. Majjhimo tīhi, kaniṭṭho dvīhi purisasatehi saddhiṃ tatheva paṭipajji. Te yāvajīvaṃ satthāraṃ upaṭṭhahiṃsu. Satthā tesaṃyeva santike parinibbāyi.