4. Mahakapāṭihāriyasuttavaṇṇanā

[346] Catutthe sesakaṃ vissajjethāti tassa kira therehi saddhiṃyeva kaṃsathālaṃ pamajjitvā pāyāsaṃ vaḍḍhetvā adaṃsu, so bhuttapāyāso therehiyeva saddhiṃ gantukāmo cintesi "ghare tāva upāsikā sesakaṃ vicāreti, idha panime dāsakammakarā mayā avuttā na vicāressanti, evamevāyaṃ paṇītapāyāso nassissatī"ti tesaṃ anujānanto evamāha. Kuthitanti kudhitaṃ, heṭṭhā santattāya vālikāya upari ātapena ca atitikhiṇanti attho. Idaṃ pana tepiṭake buddhavacane asambhinnapadaṃ. Paveliyamānenāti paṭiliyamānena. Sādhu khvassa bhanteti "phāsuvihāraṃ karissāmi nesan"ti cintetvā evamāha.

Iddhābhisaṅkhāraṃ abhisaṅkharīti adhiṭṭhāniddhiṃ akāsi. Ettha "mandamando sītakavāto vāyatu, abbhamaṇḍapaṃ katvā devo ekamekaṃ phusāyatū"ti evaṃ nānāparikammaṃ "savāto devo vassatū"ti evaṃ adhiṭṭhānaṃ ekatopi hoti. "savāto devo vassatū"ti ekato parikammaṃ, mandamando sītakabhāvo vāto vāyatu, abbhamaṇḍapaṃ katvā devo ekamekaṃ phusāyatū"ti evaṃ nānāadhiṭṭhānampi hoti. Vuttanayeneva nānāparikammaṃ nānādhiṭṭhānaṃ, ekato parikammaṃ ekato adhiṭṭhānampi hotiyeva. Yathā tathā karontassa pana pādakajjhānato vuṭṭhāya

Okāsesīti vippakiri.