TIPITAKA Volume 18 : PALI ROMAN Sutta Pitaka Vol 10 : Sutta. Saṃ. Saḷa.

[249] Ekaṃ samayaṃ bhagavā rājagahe viharati jīvakambavane. Tatra kho bhagavā bhikkhū āmantesi .pe. Samādhiṃ bhikkhave bhāvetha. Samāhitassa bhikkhave bhikkhuno yathābhūtaṃ okkāyati 1- . Kiñca yathābhūtaṃ okkāyati. Cakkhuṃ aniccanti yathābhūtaṃ okkāyati rūpā aniccāti yathābhūtaṃ okkāyati cakkhuviññāṇaṃ aniccanti yathābhūtaṃ okkāyati cakkhusamphasso aniccoti yathābhūtaṃ okkāyati yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti yathābhūtaṃ okkāyati .pe. mano aniccoti yathābhūtaṃ okkāyati dhammā aniccāti yathābhūtaṃ okkāyati .pe. yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti yathābhūtaṃ okkāyati. Samādhiṃ bhikkhave bhāvetha . samāhitassa bhikkhave bhikkhuno yathābhūtaṃ okkāyatīti. Pañcamaṃ.