TIPITAKA Volume 18 : PALI ROMAN Sutta Pitaka Vol 10 : Sutta. Saṃ. Saḷa. Samuddavaggo tatiyo

[285] Samuddo samuddoti bhikkhave assutavā puthujjano bhāsati. Neso bhikkhave ariyassa vinaye samuddo . mahā eso bhikkhave udakarāsi mahā udakaṇṇavo . cakkhuṃ bhikkhave purisassa samuddo tassa rūpamayo vego yo taṃ rūpamayaṃ vegaṃ sahati ayaṃ vuccati bhikkhave atari cakkhusamuddaṃ saummiṃ sāvaṭṭaṃ sagāhaṃ sarakkhasaṃ tiṇṇo pāragato thale tiṭṭhati brāhmaṇo .pe. jivhā bhikkhave purisassa samuddo tassa rasamayo vego yo taṃ rasamayaṃ vegaṃ sahati ayaṃ vuccati bhikkhave atari jivhāsamuddaṃ saummiṃ sāvaṭṭaṃ sagāhaṃ sarakkhasaṃ tiṇṇo pāragato thale tiṭṭhati brāhmaṇo .pe. mano bhikkhave purisassa samuddo tassa dhammamayo vego yo taṃ dhammamayaṃ 1- vegaṃ sahati ayaṃ vuccati bhikkhave atari manosamuddaṃ saummiṃ sāvaṭṭaṃ sagāhaṃ sarakkhasaṃ tiṇṇo pāragato thale tiṭṭhati brāhmaṇoti . Idamavoca .pe. Satthā