TIPITAKA Volume 18 : PALI ROMAN Sutta Pitaka Vol 10 : Sutta. Saṃ. Saḷa. Cittagahapatipucchāsaṃyuttaṃ 1-

[537] Ekaṃ samayaṃ sambahulā therā bhikkhū macchikāsaṇḍe viharanti ambāṭakavane . tena kho pana samayena sambahulānaṃ therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi saññojananti vā āvuso saññojaniyā dhammāti vā ime dhammā nānatthā nānābyañjanā udāhu ekatthā byañjanameva nānanti . tatrekaccehi therehi bhikkhūhi evaṃ byākataṃ hoti saññojananti vā āvuso saññojaniyā dhammāti vā ime dhammā nānatthā ceva nānābyañjanā cāti . Ekaccehi therehi bhikkhūhi evaṃ byākataṃ hoti saññojananti vā āvuso saññojaniyā dhammāti vā ime dhammā ekatthā byañjanameva nānanti.