TIPITAKA Volume 18 : PALI ROMAN Sutta Pitaka Vol 10 : Sutta. Saṃ. Saḷa.

[801] Atha kho vacchagotto paribbājako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho vacchagotto paribbājako bhagavantaṃ etadavoca kiṃ nu kho bho gotama atthattāti . evaṃ vutte bhagavā tuṇhī ahosi . kiṃ pana bho gotama natthattāti . dutiyampi kho bhagavā tuṇhī ahosi . Atha kho vacchagotto paribbājako uṭṭhāyāsanā pakkāmi.