TIPITAKA Volume 18 : PALI ROMAN Sutta Pitaka Vol 10 : Sutta. Saṃ. Saḷa. Lokakāmaguṇavaggo dutiyo

[165] Santi bhikkhave cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati . ayaṃ vuccati bhikkhave bhikkhu āvāsagato mārassa mārassa vasaṃ gato paṭimukkassa mārapāso bandho 1- so mārabandhanena yathākāmakaraṇīyo pāpimato .pe. santi bhikkhave jivhāviññeyyā rasā .pe. santi bhikkhave manoviññeyyā dhammā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati . ayaṃ vuccati bhikkhave bhikkhu āvāsagato mārassa mārassa vasaṃ gato paṭimukkassa mārapāso bandho so mārabandhanena yathākāmakaraṇīyo pāpimato.